تحيرني تلك النظرة فى عينيك
أتوه فى كلماتها رغم صمت شفتيك
هي نظرة تقول الكثير والكثير
تشدني وتجذبني إليك
أتساءل هل ما قرأته فى عينيك حقيقي؟؟
أم أنى توهمت تلك الرسالة
أتذكر حين تلاقت عينينا
حينها انتفض قلبي كاليمامة
ان كنت تبحث بداخلي عن حبيبة
فأنا لا أصلح لهذه المكانة
فما تراه أمامك يا سيدي ليس أنا
بل حطام لأنثي ضحية للخيانة
رغم سعادتي بتلك النظرة
فأنا أخاف عليك من شعورك بالندامة
أرجو أن أكون مخطئة فى تفكيري
كي تعبر باحساسك الى شاطئ السلامة
فكل من أرست سفنه على شواطئي
رحل بخيبة أمل فى عواطفي
وترك بقلبي أكبر علامة
أرجوك لا تفكر بي كمحب
واتركني أجمع حطامي وأضمد جوارحي
كم أنت غريب أيها القدر
قضيت نصف عمري أبحث عن حب
ولم أجده بين البشر
ومللت من البحث الطويل
حتى فكرت بالبديل
وقبلت بانسان قلبه كالحجر
فكرهت هذا الحب وكرهت حياتي
وقررت الانسحاب واثرت الرحيل
وعزمت أن أمضي قدما
بلا حب .. بلا عشق .. بلا احساس جميل
ثم ظهرت انت أمامي
بنظرتك التي أصبح نسيانها مستحيل
اول مرة اكتب قصيدة ومعرفش اكملها. ايه الى بيحصلى
دى مش أول مرة اخد بالى من البصة دى .
بس اشمعني المرة دى مش على بعضي ؟؟
مش عارفة اذا كنت خدت بالك انى شوفتك ولا لأ بس انت كنت مركز اوى معايا
كنت بتبص نفس البصة الى فى الصورة دى بالظبط
اوعى يكون الى انا حسيته صح ؟؟؟
لان هتكون انت الى خسران عشان انا منفعش
ولو كان احساسي غلط يبقي البصة دى وراها ايه
بقالي اسبوع مش عارفة انسي شكلك لما عيني جات فى عينك صدفة
مش معقول تكون صدفة تتكرر اكتر من مرة
ومن نفس الشخص
مع ان دى حاجة جميلة والمفروض اى بنت تفرح بالاهتمام دة
بس انا بقة مش سعيدة . فيه حاجة غلط
انا عارفة كويس ان مفيش حد يقدر يتحكم فى احساسه
بس اكيد اي حد يقدر يتحكم فى تصرفاته
وانا عارفة حدودى وبعرف ازاى أفرمل
جايز بعرف اتحكم فى رد فعلى عشان انا مش حاسة بحاجة أصلا
بس انت ربنا يستر عليك من الى انت فيه
يارب اكون غلطانة فى تفكيري
عشانك انت مش عشانى
ياريتك تفرمل فى الوقت المناسب